BUTUAN CITY – Nakuha sa usa ka 49-anyos nga atleta gikan sa Aruba ang iyang ika-10 nga titulo sa Guinness World Records human niya nabira ang usa ka bus gamit ang iyang liog .
Gigamit ni Egmond Molina ang usa ka pisi nga gihigot sa iyang li-og aron mabira ang 21,737-pound nga bus ug gikumpirma na karon sa Guinness World Records nga opisyal niyang nabungkag ang rekord sa pinakamabug-at nga sakyanan nga nabira gamit ang liog nga natala ni Dmytro Hrunskyi gikan sa Ukraine niadtong 2024.
Sigon ni Molina, kinahanglan niyang mogamit og kusog samtang kontrolado pag-ayo ang pagginhawa ilalom sa grabeng kakapoy gamit usab ang psychological nga pakigbisog aron magpabiling kalmado bisan pa sa grabe nga pressure sa lawas.
Lakip sa ubang rekord ni Molina sa Guinness World Records mao ang pinakapaspas nga pagbira og bus sulod sa 20 metros gamit ang usa ka tudlo sa oras nga 33.32 segundos; pinakapaspas nga pagbira og tram sulod sa 20 metros gamit ang ngipon sa oras nga 39.9 segundos; pinakapaspas nga pagpabuto og hot water bottle sa 2.87 segundos; ug pinakadaghan nga crown cap bottles nga naabrihan gamit ang duha ka kamot sulod sa 30 segundos nga naka-abot og 6 ka botelya.
Sigon si Molina. iyang gihalad ang iyang mga rekord alang sa iyang mga anak ingon man usab sa kabatan-onan sa Aruba.
