BUTUAN CITY- Pakyas ang petisyong gipasaka ni Atty. Manases “Mans” Carpio nga pugngan ang impeachment proceedings batok kang Vice President Sara Duterte.
Kini human gibasura sa Quezon City Regional Trial Court (RTC) Branch 81 ang reklamo sa kampo ni Carpio.
Sumala sa korte, walay hurisdiksyon ang RTC aron mangilabot sa gahom sa House of Representatives nga maghimo og impeachment proceedings subay sa Konstitusyon.
Gibalibaran usab sa korte ang hangyo nga writ of preliminary injunction batok nila House Speaker Bojie Dy, House Committee on Justice chairperson Rep. Gerville Luistro, ug Bureau of Internal Revenue kon BIR Commissioner Charlito Martin Mendoza.
Gipasiugda usab sa huwes nga adunay gahom ang House Committee on Justice nga mag-isyu og subpoena isip parte sa ilang constitutional mandate sa impeachment process.
Human sa pag-apruba sa House Committee on Justice sa Articles of Impeachment batok kang VP Duterte, gikatakda na kini bothan sa plenaryo sa Kamara karung Mayo 11, 2026.
