BUTUAN CITY – Dili mu-ubos sa 19 ka mga tawo ang patay sa Israeli air strikes sa southern Lebanon, kondiin sigon sa health ministry sa maong nasud, apil sa namatay ang tulo ka mga bata ug tulo ka mga babaye nga nakalas sa usa lang ka pag-atake sa ilang balay sa lungsod sa Deir Qanoun.
Madumdumang nadamay sa giyera ang Lebanon niadtong Marso 2 dihang gitirahan og rockets sa armadong Shia Islamist group nga Hezbollah kansa suportado sa Iran, ang Israel isip balos sa US-Israeli strikes nga mikalas sa supreme leader sa Iran.
Natala ang pinaka-ulahing patay human nagkasabot ang Lebanon ug Israel nga lugwayan og 45 ka mga adlaw ang ceasefire kondiin gikatakdang mubalik unta sa panaghinabi ang duha ka panig sa pagsugod sa buwan sa Hunyo.
Apan taliwa sa extension, padayong nagbinayluay og tira ang Israel ug Hezbollah ilabina sa southern Lebanon.
Sigon sa Israel, ilang gi-target ang armadong grupong Hezbollah apan kasagaran mga sibilyan ang nakalas apil na ang mga bata ug mga babaye.
Mitira ang Hezbollah og mga rockets ug drones ngadto sa mga komunidad sa northern Israel ug batuk sa Israeli troops nga nag-ukupa sa pipila ka parte sa southern Lebanon.
