BUTUAN CITY – Padayon pa ang imbestigasyon sa kapulisan sa Nasipit, Agusan del Norte aron ma-ilhan ang responsable ug masuta ang motibo sa pagpamusil kagabii atol sa disco nga gikamatay sa usa ka ulitawong estudyante ug pagka-angol sa laing duha.
Naila ang namatay nga si Alj Regino Cañete, 24-anyos, residente sa Brgy. 5 samtang ang mga nadala sa ospital mao sila Alden Abolloc Pescante Jr., 34-anyos, ulitawo, wala’y trabaho, silingan sa namatay ug si Kenron Palisan Balunan, 33-anyos, minyo, usa ka bajaj driver ug residente sa District 4, Brgy. Punta sa susamang lungsod.
Base sa inisyal nga imbestigasyon sa kapulisan, kalit lang matud pang miduol sa biktima ang usa ka wala nailang lalaki atol sa disco sa gawas nga bahin sa Nasipit Central Elementary School kon NACES dayong pusil niini sa makadaghang higayon hangtud nga nadamay pa ang laing duha dayong sibat padulong sa wala matinong direksyon.
