BUTUAN CITY- Mingkanaog na sa iyang puwesto si Wes Streeting isip Health Secretary sa gobyerno ni Keir Starmer human niing gipadayag nga nawad-an na kini og pagsalig sa liderato sa prime minister taliwala sa nagkagrabeng krisis sulod sa Labour Party. Sa iyang sulat kang Starmer, gibutyag ni Streeting nga “where we need vision, we have a vacuum.
Where we need direction, we have drift,” kansa nagpasabot sa iyang kasagmuyo sa direksyon sa administrasyon. Bisan wala pa kini pormal nga naglunsad og leadership challenge, gipahibalo niini kang Starmer nga klaro na matud pang dili na kini maoy modala sa Labour Party ngadto sa sunod nga general election.
Aron mapahigayon ang leadership contest, gikinahanglan ni Streeting ang suporta sa labing menos 81 ka Labour MPs, bisan pa man adunay nagkalainlaing pamahayag kon igo na ba ang iyang suporta sulod sa partido. Samtang, mipadayag usab si Starmer sa iyang tubag nga nagbasol kini sa pagbiya ni Streeting ug gipasiugda nga kinahanglang matuman sa gobyerno ang mga saad niini ngadto sa katawhan.
Misamot usab ang tensyon sa partido human mipakita og interes si Deputy Prime Minister Angela Rayner nga mosalmot sa posibleng leadership race, ilabina human niining gibutyag nga cleared na sa HM Revenue and Customs may kalabotan sa kontrobersyal nga 40,000 pound stamp duty issue. Sa kasamtangan nag-atubang si Starmer og dakong presyur aron mapreserbar ang iyang liderato human sa bug-at nga kapildihan sa Labour Party sa bag-ohay nga eleksyon sa nagkalainlaing bahin sa Britain.
