BUTUAN CITY – Gipangunahan ni Education Secretary ug Vice President Sara Duterte ang culmination program sa Department of Education sa pagsa-ulog sa Pilipinas sa National Teachers’ Day 2023.
Sa pag-abot pa lang sa besi presidente sa mismong venue sa Father Saturnino Urios University kon FSUU Morellos Campus sa Brgy Libertad ning siyudad sa Butuan, dugay kining naka-abot sa entablado tungod sa kadaghansa mga magtutudlong misugat kaniya og nagpa-selfie ug nagpa-groupie.
Ang maong eksena wala gipalabay ni Agusan del Norte Governor Ma. Angelica Rosedell Amante tungod kay nagtuo na siyang dili na kini maka-abot pa sa stage.
Hinuon dako ang iyang pagpasalamat nga gibisita sa besi presidente ang Agusan del Norte tungod kay dakong garbo matud pa kini sa lalawigan ug sa dakbayan sa Butuan.
Samtang sa iyang pagpamulong, gidayeg ni VP Sara ang mga magtutudlo sa ilang dakong papel sa pag-umol sa panghuna-huna sa mga kabataan ingon man sa kalambuan sa atong nasud.
Ubay-ubay nga mga programa ug proyekto sa ilang ahensya nga mabenepisyuhan sa mga magtutudlo ang gipa-abot sa opisyal nga ila usab nga gikalipay.
