BUTUAN CITY – Usa ka tawo ang namatay sa magnitude 7.4 nga linog nga nahitabo duol sa Ternate sa Indonesia, nga midamyos sa mga bilding ug maoy hinungdan sa gagmay nga tsunami waves.
Ang linog nahitabo pasado alas-6:48 sa buntag (lokal nga oras), sumala sa United States Geological Survey kansa duna’y giladmon nga 35-kilometros, ug ang sentro (epicenter) nahimutang mga 127-km sa kasadpan-habagatan-kasadpan sa Ternate.
Ang kusog nga linog, nga milungtad og 10 hangtod 20 ka segundo, nabati sa Bitung ug sa palibot niini, ingon man sa Ternate, sumala sa Badan Nasional Penanggulangan Bencana (BNPB).
Sumala sa Badan Meteorologi, Klimatologi, dan Geofisika (BMKG), adunay lima ka lugar nga nakatala og tsunami waves kondiin ang pinakataas nga 0.75 metro nahitabo sa North Minahasa.
Sa kinatibuk-an, 11 ka aftershocks ang natala, ug ang pinakadako adunay magnitude nga 5.5.
