BUTUAN CITY – Gikabalak-ang mabu-ak ang duha ka semanang hunong-binombahay tali sa Estados Unidos ug Iran human nga subling mi-init ang tensyon tungod sa padayong pagpamomba sa Israel didto sa Lebanon.
Bisan og parehong nagdeklara og kalampusan ang Washington ug Tehran sa nakab-ot nga ceasefire, apan nabahiran kini og tensyon tungod sa grabeng airstrikes nga gihimo sa Israel ilabina sa capital Beirut.
Sigon sa Lebanese Health Ministry, mi-abot sa 182 ka mga indibdiwal ang namatay samtang halos 900 usab ang angol.
Gipamugos sa Israel nga dili sakop sa Estados Unidos ug Iran ceasefire ang ilang opensiba batuk sa mga militanteng grupong Hezbollah nga atua sa Lebanon kansa gisuportahan usab ni US Vice President JD Vance.
Apan nagbahad ang Iran nga posibleng mahugno ang ceasefire ilabina nga nagbahad si Israeli Prime Minister Benjamin Netanyahu nga ipadayon ang ilang airstrikes batuk sa maong grupo.
