BUTUAN CITY – Gihisgutan na sa kagamhanan sa United Kingdom kon UK ang pagsuporta sa posibleng mga bids alang sa Olympics ug Paralympics sa tuig 2040.
Una nilang gisusi kung mahimo bang mag-host ang UK sa dula sa unang higayon sukad sa London 2012 Olympics kondiin apil sa ilang gikonsidera ang posibleng gasto, benepisyo sa sosyo-ekonomiya, ug kahigayunan sa kalampusan.
Sigon sa Department for Culture, Media and Sport (DCMS), gusto nilang himuon ang UK nga unang destinasyon alang sa pag-host sa dagkong sports events, ug ginahuna-huna na usab nila kung musuporta ba sa mga bid aron ipahigayon ang golf nga Ryder Cup ug Solheim Cup sa tuig 2030.
Madumdumang katapusang gipahigayon ang duha ka team competitions sa UK niadtong 2014 ug 2019, nga pareho nahitabo sa Gleneagles sa Scotland.
Ning nakalabay’ng mga bulan, nagkadako ang suporta sa ideya nga ibalik ang Olympics sa UK sa ika-upat nga higayon.
Ning miaging tuig, gibutyag ni London Mayor Sadiq Khan, nga gusto niya nga mu-bid ang siyudad alang sa 2040 Olympic Games.
Sa kasamtangan, ang Los Angeles sa United States ug Brisbane sa Australia maoy mag-host sa 2028 ug 2032 Games, ug wala pa pilia sa International Olympic Committee ang mga siyudad alang sa mag-host sa 2036 ug sunod pa nga mga tuig.
