BUTUAN CITY- Gipadayag sa Philippine Coast Guard (PCG) nga magpadala kini og mga aircraft ug barko aron babagan ug bugawon ang upat ka Chinese research vessels nga nakita sulod ug palibot sa teritoryal nga kadagatang sakop sa Pilipinas.
Ang mga barko nasigpatan gamit ang Canada’s Dark Vessel Detection System ug gituohang minghimo og “ilegal nga marine scientific research” nga walay pagtugot sa panggamhanan sa Pilipinas, nga daw paglapas sa United Nations Convention on the Law of the Sea (UNCLOS).
Samtang si PCG Commandant Admiral Ronnie Gil Gavan nagpasalig nga subay sa direktiba ni President Ferdinand R. Marcos Jr., magpabilin ang Coast Guard nga lig-on sa pagpanalipod sa maritime domain sa nasud, diin nagpakita sa determinasyon sa Pilipinas sa pagpanalipod sa soberanya ug pagdaugdaug sa mga hulga sa gawas nga makadaot sa interes sa nasud.
