BUTUAN CITY – Gipadayag ni Ukrainian leader Volodomyr Zelensky nga pahagba na usab ang usa ka bag-ong “iron curtain” ug pasira na ang Russia gikan sa “civilised world” human gisugdan niini ang pag-atake sa ilang nasud.
Sigon ni President Zelensky, ang tahas sa Ukraine mao ang dili pagpahagba sa maong kurtina diha sa ilang teritoryo. Ang iron curtain nagpasabot sa panagbahin-bahin tali sa mga communist east ug mga capitalist west sa Urupa gikan sa pagtapos na sa ikaduhang gubat sa kalibutan ngadto na sa pagtapos usab sa Cold War.
Namulong si Zelensky sa usa ka video address ngadto sa iyang katawhan kondiin nag-ilis na siya gikan sa iyang na-andang sapot ngadto na sa usa ka military uniform.
Madumdumang nagsugod ang pagpanakop sa Russia sa Ukraine diha sa kamad-an, kahanginan ug kadagatan human ang pre-dawn TV address kondiin gi-demand ni Russian President Vladimir Putin ngadto sa kasundaluhan sa Ukraine pagpa-ubos na sa ilang mga armas ug mupa-uli na ngadto sa ilang tagsa-tagsa ka pamilya.
Natigayon kini human ang pila ka semana tensyon dihang gipangkatag sa Russia ang ilang kasundaluhan sa utlanan sa Ukraine.
Sa pagkakaron, padayon ang pag-abante sa Russian forces sa pipila ka mga fronts, apil niini ang paglusad nila og mga missile strikes ug pag-abante ngadto sa capital Kyiv.
Dili pa usab klaro karon ang insaktong ihap sa mga casualties apan apil matud pa niini ang mga Ukrainian civilians.
Samtang giatubang karon sa Russia ang pipila ka mga gipahamtang nga sanction sa ubang dagkong nasud.
Sumala pa usab kang Nato chief Jens Stoltenberg nga dugay ng gilusad sa Russia ang “cold-blooded” o”cold war” sa planong pagpangatake.
Gipahimangnuan usab ni Putin ang Moscow nga maghimo og aksyon ang Russia kung duna’y mosulay ug manginlabot kanila.
