BUTUAN CITY – Hangtud karon wala pa gihapon nag-sink in kang Engr. Daryl Suarez, graduate sa Caraga State University kon CSU-Butuan main campus nga ika-unom siya sa Top 10 sa 2023 Mining Engineers Licensure Examination tungod sa kalisod matud pa sa eksaminasyon.
Sa eksklusibong pakighinabi sa Bombo Radyo Butuan, gibutyag sa bag-ong enhinyero nga iyang gipangandoy nga masulod sa Top 10 apan tungod sa grabe kalisod sa tulo ka adlaw nga eksaminasyon, iya na lang gi-ampo nga makapasar siya niini. Human niya og graduate ning mi-aging tuig, nanarbaho gilayon siya sa Antipolo City ug ning tuiga lang mikuha sa eksaminasyon.
Dako niyang garbo tungod kay bisan og migradwar siya nga wala’y flying colors, nasulod siya sa Top 10 kansa angayan lang matud pa tungod sa iyang paningkamot.
Dako ang iyang pagpasalamat sa kompanyang iyang gitrabahuan human siya gitugutan nga mag-leave of absence og tulo ka buwan alang sa iyang review sa kauluhang Manila.
Gawas sa iyang mga naka-ila atol sa iyang pag-review nga mitabang kaniya, mitabang usab kaniya ang iyang mga classmates nga ania lang sa Butuan City nag-reivew rason nga iya silang gipasalamatan sa kalampusang iyang na-angkon nga iya usab nga gipahinungod sa iyang pamilya nga maoy iyang inspirasyon.
Karon, magtrabaho una siya sa kompanyang gitrabahuan karon isip pagpakita sa iyang utang kabubut-on apan gusto niyang makatrabaho sa gobyerno ilabina sa Environmental Management Bureau aron iyang magamit sa field ang iyang kurso ilabina ilalom sa minahan.
