BUTUAN CITY – Wala malilong ang kasuko ni Senador Ronald ‘Bato’ de la Rosa dihang gikompronta niya sa Pagdungog sa Senate Committee on Women and Children, si Mary Ann Maslog kinsa nalambigit sa 1998 textbook scam ug nagpaka-aron ingnon matud pa nga patay.
Sa maong pagdungog, gibutyag ni de la Rosa nga duna siya’y nakuhang A-1 information nga duna’y taga-Malakanyang nga migamit kang Maslog aron kumbinsihon si dismissed Bamban, Tarlac Mayor Alice Guo nga mupirma sa usa sa affidavit nga magduot kaniya uban nila kanhi Pangulong Rodrigo Duterte, Senador Christopher ‘Bong’ Go ug kanhi Criminal Investigation and Detection Group kon CIDG Chief Major General Romeo Caramat nga duna’y koneksyon sa Philippine Offshore Gaming Operations kon POGO.
Pamugos sa senador, mibisita matud pa si Maslog sa custodial center diin nabilanggo si Guo aron kini papirmahon og affidavit.
Samtang sigon usab ni Senate President Pro-tempore Jinggoy Estrada, gikan na siya sa PNP Custodial Center rason nga nasayod siyang lisod ang pagpasulod sa maong pasilidad labaw na sa ordinaryong tawo sama kang Maslog.
Ang tugutan lang matud pang makasulod mao ang abogado, pamilya, doktor ug kadtong duna’y direktang koneksyon sa nabilanggo.
Namahayag usab sa pagdungog pinaagi sa videocall si PNP Intelligence Group chief BGeneral Romeo Macapaz kinsa nagpakitabang matud pa kang Maslog aron maoy mupataliwa sa pagsurender ni Alice Guo sa Indonesia niadtong Septembre. Kini human matud pa gibutyag ni Maslog nga mihangyo kaniya si Macapaz tungod kay iya matud pang higala si Sual, Pangasinan Mayor Dong Calugay nga duna matud pa’y romantic relationship kaniadto ni Guo.
Aminado ang heneral nga usa siya sa mga mitabang kang Maslog nga makasulod sa PNP Custodial Center isip pasalamat sa pagtabang kanilang madakpan si Alice Guo, butang nga gipalagan sa mga senador.
Tungod niini, gipa-cite in contempt ni de la Rosa si Maslog ilabina dihang gibutyag ni Macapaz nga si Maslog ang miduol kaniya aron mutabang pagpataliwala kang Guo.
