BUTUAN CITY – Duda si Senador Nancy Binay sa gipadayag ni National Economic and Development Authority kon NEDA Secretary Arsenio Balisacan nga dili makonsiderang food poor ang usa ka indibidwal nga makagasto og 64-pisos kada adlaw sa iyang pagkaon kon bugti sa kapin 21-pisos kada-kaon sa pamahaw, pani-udto ug panihapon.
Sa pagsusi sa Senate Committee on Finance nga gipangunahan ni Senadora Grace Poe alang sa proposed 2025 national budget, gibutyag ni Balisacan nga as of tuig 2023, ang 64-pisos kada-adlaw nga gasto sa pagkaon sa usa ka indibidwal, maoy sukdanan nga dili makonsiderang naglisod sa pagkaon samtang sa poverty treshhold usab, 91-pisos kada-adlaw ang sukdanan kansa nagpasabot nga kung mu-abot sa 91-pisos ang kita sa usa ka tawo kada-adlaw, dili siya makonsiderang kabus.
Dili makatuo si Senadora Nancy Binay sa datus ni Balisacan dayong butyag nga kinahanglang i-review kini tungod kay sa inflation rate pa lang karong tuiga, kuwangon ra ang maong mga kantidad.
