BUTUAN CITY – Gireklamo sa mga Caraganon Locally Stranded Individuals kon SLIs nga sakay sa sweeper flights nga mitugpa sa Laguindingan Airport sa Cagayan de Oro City, ang grabe kataas sa sukot sa plitihan sa mga passenger vans human nga mismong ang mga SLIs nga nangabot sa maong tugpahanan ang nakasinati niini ug nangreklamo dinhi sa Bombo Radyo Butuan.
Sigon ni Sarah Jane Apat nga taga-Butuan City, 13 sila nga nagpa-abot og mga sakyanang musugat kanila kagahapon apan na-udto na lang, wala matud pa’y nangabot.
Duna matud pa’y miduol kanila nga duna’y suot nga ID sa Department of Interior and Local Government kon DILG ug nag-canvass alang niadtong musakay og de-pasayruang van kondiin gihanyagan sila nga ihatud padulong sa lungsod sa Carmen, Agusan del Norte bugti sa sukot nga tag-usa ka libo ka pesos kada-usa kanila.
Ang ilang gikasakit tungod sa grabe kamahal sa ilang sukot nga mi-abot na sa tag-5 mil, 6,500 ug 8-mil pesos depende sa lugar nga hatdan kanila.
Gisaysay pa niini, nag-loan na lang ang iyang inahan aron duna’y ikapalit og plane ticket alang sa iyang pagpa-uli rason nga apil siya sa 13 nga natanggong sa maong airport tungod sa kawala’y kwartang ikapakyaw alang sa ilang pagpa-uli na dinhi sa Caraga Region.
Apan duna matud pa’y mga magti-ayong taga-Cabadbaran City ng gipangayuan og 8-mil pesos kansa gipahangyo ug 6,500-pesos dayong larga. Gawas pa kini sa lang magti-ayong taga-Butuan City nga gipahangyo usab og 5-milpesos gikan sa unang hanyag nga 6,500-pesos nga plitehan.
Susamang reklamo usab ang gipa-abot sa laing SLI nga si Abegail Anastacio nga taga-Nasipit, Agusan del Norte kinsa wala usab maka-uli ka-uban ang laing tulo niya ka mga kababayan ug siyam pa ka mga Caraganons.
Kini ilabina nga libre lang ang ilang pagsakay padulong sa Laguindingan Airport kondiin kampante silang makapa-uli na base na usab sa briefing kanila nga sunduon lang sila mga hingtungdang local government units.
