Surigao City port, nakatala na og mga stranded nga pasahero og cargoes
BUTUAN CITY – Gikumpirma ni Philippine Coast Guard-Surigao del Norte Station Commander Lauren Roque nga duna na’y mga stranded nga pasahero, rolling cargoes, mga bangkang de pasahero og mga barko sa port base sa Surigao City.
Kini human nila gisuspende sugod kaganinang alas-siete sa buntag ang tanang mga biyahe sa mga sakyanang pandagat nga padulong sa mga lugar nga may public storm warning signal og duna’y strong gale warning.
Sa eksklusibong pakighinabi sa Bombo Radyo Butuan, gipadayag sa opisyal nga sa pagkakaron, nakatala na sila og 110 ka mga stranded nga pasahero sa Surigao City port pa lang gawas pa kini sa 10 ka mga rolling cargoes sama sa mga bus og uban pang sakyanang mutabok sa dagat sakay sa Ro-Ro vessel, lima ka mga de-pasaherong motor banca nga padulong sa mga island municipalities sa lalawigan og lima ka mga dagkong barko.
Samtang gipadayag usab ni P/Chief Insp. Largie Mercado – hepe sa Dinagat Island Municipal Police Station sa Dinagat Island province nga padayon ang ilang monitoring sa mga coastal barangays aron makapagawas gilayon og pre-emptive evacuation kung kinahanglanon. (Beth Ruiz)
