BUTUAN CITY – Nabalik na ang suplay sa kuryente sa pipila ka parte sa mga dapit nga naapektuhan sa magnitude 7.8 nga linog nga miigo sa Sarangani ug mga silingang lalawigan kagahapong adlawa, Lunes.
Sigon sa Department of Energy (DOE), hapit na mabalik ang suplay sa kuryente sa kadaghanan sa mga lugar nga nawad-an og kuryente human sa kusog nga linog.
Sa unang assessment, upat ka power plant, duha ka transmission line, upat ka pribadong power utility, ug walo ka electric cooperative ang naapektuhan sa kusog nga linog.
Apan sa ulahing taho, duha sa mga power plant ang naayo na, ug duna nay partial nga pagbalik sa transmission services.
Gawas niini, nakahatag na usab og serbisyo ang upat ka private distribution utilities ug pito ka electric cooperatives.
Bisan pa man niini, nagpabilin gihapon nga walay kuryente ang mga lugar nga sakop sa South Cotabato II Electric Cooperative Inc., nga kasamtangang nakasinati og total blackout.
Sumala ni Energy Secretary Sharon Garin, mokabat sa 864-mil ka panimalay ang naapektuhan sa pagkapalong sa kuryente sa pipila ka parte sa lalawigan sa Sarangani, South Cotabato, Sultan Kudarat, Davao Region, ug mga kasikbit nga dapit.
