BUTUAN CITY – Nakabsan na sa kinabuhi ang usa ka sundalong sakop sa 26th Infantry “Ever Onward” Battalion atol sa engkwentro tali sa gibana-banang 20 ka mga rebeldeng New People’s Army dapit sa ilang hideout sa kabukiran sa Km. 41 Barangay Binicalan, lungsod sa San Luis, Agusan del Sur.
Nasayrang daling gi-airlift sa ospital ang wala pa panganling sundalo human na-igo og duha ka bala sa iyang lawas apan wala na niini makaya pa ang na-angkong injury hinungdan sa iyang pagkamatay.
Sigon ni LTC Romeo Jimenea, Commander sa 26IB, naglusad og security operations sa ilang tropa isip suporta sa nagpadayong road construction project sa San Luis-Binicalan-Bukidnon Provincial Road, dihang natigayon ang engkwentro.
Kabahin kini sa Critical Infrastructure Protection and Security Operations efforts sa Philippine Army.
