BUTUAN CITY – Nagduso og sugyot balaodnon si Leyte Rep. Ferdinand Martin Romualdez aron maminusan ang ihap sa namatay sa cancer sa nasud pinaagi sa mga programa sa sayu nga deteksyon.
Sa ilalom sa House Bill No. 7942 o ang Cancer Risk Screening and Awareness Act, tumong ni Romualdez ug ni Tingog Party-list Rep. Jude Acidre nga himoong institusyonal ang libre nga screening sa mga barangay.
Unang tutukan sa programa ang breast, cervical, colorectal, ug prostate cancer.
Gitumbok ni Romualdez nga base sa datos sa Philippine Statistics Authority (PSA), nga usa ang cancer sa mga nag-unang hinungdan sa kamatayon sa Pilipinas tungod sa katapusang pagsusi o late diagnosis.
Sumala sa magbabalaod, ang sayu nga pagtumbok sa sakit dili lang magluwas sa kinabuhi kundi magpakunhod usab sa gastos sa pagpatambal nga kasagaran nagpasakit sa mga pamilya.
Pakusgon usab sa bill ang papel sa mga Barangay Health Workers (BHWs) pinaagi sa pagbansay sa cancer prevention ug patient support.
Magtukod usab og usa ka nationwide cancer risk profiling system ang Department of Health (DOH) kauban ang mga lokal nga kagamhanan aron mamonitor ang mga kaso sa nasud.
