BUTUAN CITY- Giduso karon sa Senado ang eBayad Act kansa nagtinguha nga himuong nag-unang pamaagi sa digital payment sa tanang transaksyon sa gobyerno aron mapaspasan ang pagbayad sa mga bayronon ug pagpagawas sa pondo ngadto sa publiko.
Ubos sa Senate Bill No. 2330 nga gisang-at ni Senador Christopher “Bong” Go, obligahon ang mga ahensya sa gobyerno, government-owned and controlled corporations, local government units, state universities and colleges, ug uban pang sakop sa balaod nga mingdawat og interoperable digital payment systems alang sa koleksiyon ug pagdisburse sa pondo, lakip ang suweldo, allowances, cash assistance, buhis, permit, ug uban pang bayronon.
Gikinahanglan usab ang pag-isyu sa electronic official receipts aron mapalig-on ang transparency ug audit sa pondo sa gobyerno, samtang adunay insentibo alang sa mga lokal nga pangagamhanan aron madani ang gagmay’ng negosyo sa paggamit sa digital payments.
Gitakda usab sa panukala ang pagsunod sa data privacy ug cybersecurity standards, uban sa padayon nga pagdumala sa Commission on Audit sa tanang digital transactions, ug hatagan ang mga ahensya og hangtod tulo ka tuig aron hingpit nga mapatuman ang sistema.
Ang mga molapas sa balaod ug sa mga regulasyong ipatuman sa Bangko Sentral ng Pilipinas mahimong mapamultahan og P200,000 hangtod P2 milyon ug mapriso sulod sa duha hangtod napulo ka tuig.
