BUTUAN CITY – Nagmugna na og ‘special panel of prosecutors’ ang Department of Justice aron maglusad og imbestigasyon mahitungod sa mga insidenteng nahitabo sa Senado sa nakalabay nga adlaw.
Sa subling pag-atubang ni Justice Secretary Fredderick Vida sa publiko human ang pagpakahilom bisan paman sa mga isyu, iyang gianunsyo ang nasangpit nga pagmugna og espesyal nga grupo.
Tumong matud pa sa ‘special panel’ sa buhatan nga makabaton og koomprehensibong ‘case-build-up investigation’ para masusi ug maimbestigahan pag-ayo ang mga nahitabo sa sulod o palibot sa senado.
Sumala sa kalihim, tugutan ang mga piskal nga makatudlo sa grupo nga mahatagan og otoridad o gahum aron mag-isyu og ‘subpoena’ ug uban pa kung gikinahanglan.
Tungod niini gimandu ni Justice Sec. Vida sa mga alagad sa balaod o ‘law enforcement agencies’ nga isubmite sa buhatan ang ebidensyang gihawiran o nakuha sa mga nahitabo sa Senado.
Partikular nga iyang gitahasang makig-alayon ang Philippine National Police-Scene of Crime Operatives, National Capital Regional Police Office, Pasay City Police Station ug National Bureau of Investigation.
Ang mga nasangpit nga ahensya gihatagan og 48-oras sa kalihim para ipreserba ug isubmite sa buhatan ang mga ebidensya may kalabutan sa mga nahitabo sa ‘Senate Complex’ niadtong ika-11 hangtud sa ika-13 sa Mayo.
Gawas sa mga gipanganlang ahensya, gitahasan usab sa Department of Justice ang Office of the Senate Sergeant-at-Arms pinaagi sa opisina ni Senate President Alan Peter Cayetano nga isumite sa ila ang taho sa mga insidente.
Lakip na niini ang pagpasa o turn-over sa buhatan sa mga ebidensyang gihawiran sama sa CCTV footages, ballistic og paraffin examination results, deployment records, communication logs, incident reports, witness statements ug uban pa.
Gawas sa mga awtoridad, gihagit sa kalihim ang publiko ug mga miyembro sa medya nga makig-alayon sa ‘special panel of prosecutors’ ugaling dunay gihawiran usab nga ebidensya.
Mamahimo nila kining isumite sa buhatan ilabina kung makatabang sa gilusad nga komprehensibong ‘case-buildup investigation’.
