BUTUAN CITY – Kumpiyansa si Senate President Alan Peter Cayetano nga magpabiling tibuok ang ilang han-ay taliwa sa pagbalhin ni Senador Chiz Escudero sa kampo sa mi-angkong bag-ong mayorya sa Senado.
Sa eksklusibong interview sa Bombo Radyo Philippines human sa gihimong pagdungog sa Blue Ribbon Committee kagahapon, gibutyag ni Cayetano nga nagtuo siyang usa pa gihapon ang prinsipyo sa nahabiling mga membro sa ilang grupo ug uban nilang himuon ang mga desisyon nga sa ilang lantaw, sakto alang sa institusyon.
Aminado ang senador nga personal niyang nabati ang bug-at nga sitwasyon tungod kay siya ang anaa sa sentro sa tensyon karon sa Senado isip Senate President.
Kung siya lang matud pa ang masunod, mas gustuhon pa niyang tangtangon na lang ang isyu sa liderato tungod kay lisod ang nasinatian sa iyang mga kaalyado samtang siya ang nakitang nag-unang nakapahimulos sa ilang baruganan.
