BUTUAN CITY – Ipa-ilalom sa lockdown sugod karong adlawa ang Sona Rossa kon Red Zone area sa Italy tungod sa nagkadaghang kaso na sa COVID-19 ug pagsulod na sa UK variant niini.
Sa eksklusibong pakighinabi sa Bombo Radyo Butuan, gipadayag ni Bombo international correspondent Edward Reyes direkta gikan sa Milan, nga apil sa Sona Rossa ang iyang lugar nga nahimutangan, Roma, Northern Italy, ug uban pa.
Dihang gipatuman ang vaccination roll out, migamay na ang kaso sa COVID-19 apan tungod sa sobrang kumpyansa sa mga tawo kondiin magdasok na pagsakay sa tren ug mga pampublikong sakyanan, mibalik kini pagdaghan.
Hinuon giklaro ni Reyes nga atol sa lockdown, pwede gihapong makagawas ang mga tawo basta duna lama’y mapakitang authorization sa mga otoridad higayong sitahon sila sa ilang katuyun paggawas sa ilang panimalay.
Samtang karong Abril 3, 4 ug 5 kon sugod sa Sabado de Gloria, Dominggo sa pagkabanhaw ug adlaw’ng Lunes, ipa-ilalom sa total lockdown ang entiro nasud sa Italya aron malikayan ang panagtapok.
Sigon ni Reyes sa ingon niini nga mga adlaw magtapok ang mga tawo ilabina nga holiday sa Italya sa Abril 5, adlaw’ng Lunes.
Dako usab ang pagpasalamat sa Filipino community sa Italya nga wala masibog ang misa alang sa 500 nga anibersaryo sa Kristiyanismo sa Pilipinas taliwa sa pagdaghan na sa natalang COVID-19 cases ug gipatuman kini partikular sa Roma karong adlawa, usa ka adlaw human ang makasaysayanong misa sa Santo Papa.
