BUTUAN CITY- Gisugdan na karung Lunes Hulyo 27, sa Pamahalaang Siyudad sa Cabadbaran ang mga kalihokan alang sa pagsaulog sa ika-19 nga Charter Day pinaagi sa nagkadaiyang pre ug post-charter activities sama sa Pickleball Tournament ug Mayor JCA Invitational Basketball Tournament.
Sumala ni Cabadbaran City Government Spokesperson Roselyn Exaure, gipasimple ang selebrasyon karong tuiga subay sa mandato sa National Government ug Provincial Government, hinungdan nga duha lamang ka adlaw ang opisyal nga programa.
Sa unang adlaw, ipahigayon ang Ecumenical Thanksgiving Service ug Kick-off Ceremony, Salo-salo sa Katawhan, Grand Tabo ta Bai, concert, ug duha ka gabii nga food bazaar sa City Hall Compound diin adunay libre nga barbecue ug rice.
Lakip usab sa maong adlaw ang sashing ceremony sa mga kandidata sa Miss Universe Philippines–Cabadbaran City. Sa ikaduhang adlaw, Hulyo 28, himuon ang State of the City Address ni Mayor Judy Chin Amante alas 2 sa hapon, sundan sa concert ug food bazaar sa gabii. Ang tanang kalihokan mahimong matan-aw pinaagi sa live stream sa Cabadbaran Today Facebook page ug sa ubang opisyal nga mga government social media pages.
Gipasiugda ni Exaure nga ang tema sa State of the City Address (SOCA) ni Mayor Judy Chin Amante karong tuiga mao ang “Serve,” kansa nagpunting sa mga serbisyo, proyekto, ug programa nga direktang napahimuslan na sa katawhan.
Sigon niini, makita na karon ang konkretong resulta sa mga inisyatiba sa siyudad sama sa mas hayag nga street lights, padayon nga pagsemento sa mga farm-to-market roads, ug ang road concreting nga nakaabot na bisan sa kabukiran sa Sitio Sumubay, Barangay Mahaba.
Gilauman usab nga maablihan na karong tuiga ang Cabadbaran City Memorial Garden, usa sa mga dagkong proyekto sa lokal nga panggamhanan.
Dugang pa niini, nga ang City Environment and Natural Resources Office kon CENRO nakadawat og national award tungod sa malampusong pagsira ug rehabilitasyon sa karaang landfill, nga karon nahimong usa ka parke nga walay baho ug gilauman nga sa dili madugay maablihan na sa publiko. Kini usab ang unang landfill sa tibuok Caraga Region nga nabag-o ngadto sa usa ka parke nga mahimong destinasyon sa mga bisita ug mahigugmaon sa kinaiyahan.
