BUTUAN CITY- Mipasidaan ang Department of Science and Technology (DOST) nga ang sobra nga paggamit sa gadgets ug screen time sa mga kabatan-onan makapadako sa risgo sa obesity ug hypertension.
Sumala ni Patricia Isabel Amita, science research specialist sa DOST, ang kombinasyon sa kakulang sa tulog, sobra nga paglingkod, ug taas nga oras sa screen makapadali sa pagkabug-at ug pagtaas sa presyon sa dugo bisan sa mga kabataan nga nag edada og 10 ngadto sa 17 anyos.
Base sa National Nutrition Survey 2023, 7 porsyento sa Filipino adolescents nakasinati na og hypertension, usa ka resulta nga gihulagaway isip “makapatingala” tungod ang maong edad gilauman nga mas lig-on ug himsog.
Gipahimangnohan usab ang mga ginikanan nga maghimo og mas aktibo nga lifestyle alang sa ilang mga anak pinaagi sa sports ug family walks, ug likayan ang paggamit sa gadgets usa ka oras sa dili pa matulog aron mas mapaayo ang kalidad sa tulog.
