BUTUAN CITY – Nag-concede ug gidawat na si Senador Alan Peter Cayetano nga dili na siya ang Senate President human mibalhin si Senador Joel Villanueva sa bag-ong mayoriya sa Senado kansa naghatag og igong ihap aron makapili og bag-ong lider sa Senado.
Bag-uhay lang gikumpirma ni Cayetano ang iyang pag-concede human sila magka-istorya ni Villanueva ug iyang gipadayag nga dili na niya kini pugngan.
Aminado siyang dili permanente ang liderato sa demokrasya tungod kay kini pinahulam lamang ug dili gayud kabtangan.
Nagpadayag usab siya sa iyang pagpasalamat ug kooperasyon sa bisan kinsa nga lehitimong mapili sa kapulungan dayong butyag nga dakong dungog sa iyang kinabuhi ang pagserbisyo isip Senate President.
“Temporaryo lang ang mga posisyon, temporaryo lang ang mga titulo, bisan ang mayorya temporaryo — apan ang inyong katungod sa kamatuoran dili. Saad nako, atong tukion kini hangtod sa tumoy, atong pangitaon ang mga mastermind. Atong paninglan sila,” dugang pa sa senador.
Bisan pa sa iyang pagbiya sa puwesto, misaad si Cayetano nga ipadayon niya ang pakigbisog alang sa kamatuoran bisan unsa pa ang iyang posisyon o titulo.
“Igawas man ko sa posisyon nga SP, pero dungog gihapon nga magpabilin nga inyong PS — inyong Public Servant,” pagtapos ni Cayetano.
