BUTUAN CITY – All set na ang security measures sa kapulisan sa Agusan del Sur alang sa ika-31 nga kasa-ulugan sa Naliyagan Festival ug ika-56 usab nga kasumaran sa kamugnaan sa maong lalawigan ka-uban ang Agusan del Norte.
Sa eksklusibong pakighinabi sa Bombo Radyo Butuan, gibutyag ni PMajor Alex Luna, operation officer sa Agusan del Sur Provincial Police Office, Marso pa lang, nagsugod na sila sa ilang security planning uban ang uban pang mga security forces sama sa Philippine Army, Provincial Correctional Services Management Office, 1502nd Agusan del Sur Ready Reserved Battalion, mga force multipliers ingon man mga barangay tanods sa lungsod sa Prosperidad.
Sigon sa opisyal, duna usab sila’y augmentation forces gikan sa Police Regional Office-13 ug uban pang p’wersa nga mutabang paghimo og panelling ka-uban ang K-9 unit.
Samtang gipadayag sa opisyal nga bukas na alang sa tanang katawhang gustong musaksi sa Naliyagan Festival kansa mao ang unang higayon nga wala na’y ipatumang health protocols sa mga musaksi sa nakahan-ay nilang mga kalihukan, sukwahi ning mi-aging tuig 2022 nga duna pa’y ginagmay’ng protocol nga gisunod tungod sa COVID-19 pandemic.
Kampante matud pa ang probinsyal nga panggamhanan pagpasulod sa tanan sa rasong bakunado na ang mayoriya sa katawhan sa tibuok nasud.
