BUTUAN CITY- Gihagit sa Samahan ng Progresibong Kabataan ang umalabot nga State of the Nation Address kon SONA ni President Ferdinand Marcos Jr. nga tubagon ang mga saad nga wala pa matuman.
Sumala ni Milo Basuel, tigpamaba sa maong grupo, nga daghan sa mga gipangsaad sa miaging SONA ang wala gihapon mapatuman, lakip na ang tag P20 matag kilo nga bugas, ang mas lapad nga pagpalapad sa Kadiwa stores aron mapabarato ang mga batakang palaliton, ug ang kampanya batok sa korapsyon.
Sigon usab niini, nga bisan gipasigarbo sa gobyerno ang pagsaka sa kahimtang sa ekonomiya ngadto sa upper middle-income status, dili kini mabati sa kadaghanang Pilipino, ilabina sa mga probinsya diin ubos gihapon ang inadlaw nga kita sa mga mamumuo.
Tungod niini, nanawagan ang grupo sa administrasyon nga paminawon ug tumanon ang mga panginahanglan sa katawhan, ilabina sa kabatan-onan, ug ipakita pinaagi sa konkreto nga mga aksyon ang tinuod nga pag-uswag sa nasud.
