BUTUAN CITY – Laing sakyanan na usab ang gidabdaban sa upat ka mga gidudahang rebeldeng New People’s Army kon NPA pila ka adlaw lang human unang gida-uban sa maong grupo ang usa ka elf truck sa may Purok 5, Sitio Tagulaje, Brgy, Antongalon ning siyudad.
Kaganinang alas-12:30 sa hapon, gidabdaban sa may Purok 7, Brgy. Taligaman ning siyudad ang usa ka Sadam truck nga gikargahan og mga bag-ong gibuntang lubi.
Sa inisyal nga imbestigasyon, gipanag-iyahan ang nasangpit nga sakyanan ni Celso Asares, minyo ug residente sa Langihan Road, Brgy. Limaha ning siyudad.
Gika-ingong gipanaog matud pa ang driver ug helper niini ug dihang gidabdaban na, mikaratil na og dagan ang duruha.
Narekober pa ang sulo nga maoy gigamit pagdabdab sakyanan diha lang sa kilid niini.
Gidala na ngadto sa Butuan City Police Station kon BCPS-4 ang driver ug helper sa nasangpit nga sakyanan kinsa gikatahong wala pasipad-i.
