BUTUAN CITY – Aminado ang lokal nga kagamhanan ning siyudad nga dili malikayang bati-on og kakapoy ang mga medical healthcare workers tungod sa padayong pagdagsa sa mga pasyenteng duna’y COVID-19.
Kini ilabina nga duna na usa’y mga healthcare workers ang nataptan na sa makamatay nga coronavirus.
Kini ang tubag ni Butuan City government spokesperson Michiko de Jesus kalabot sa post sa kadumalahan sa Butuan Doctor’s Hospital kansa mi-apela og pagsabot sa publiko sa ilang sitwasyon karon tungod kay halos wala na’y pahulay ang ilang mga personahe, ma-atiman lang kutob sa ilang makaya ang mudagsa nga mga pasyente.
Sa eksklusibong pakighinabi sa Bombo Radyo Butuan, gipadayag ni de Jesus nga kini ang sitwasyon sa tanang mga ospital ning siyudad rason nga ila nang seguraduhong mahatagan og saktong shifting ang mga medical workers aron dili na kaayo mabug-atan sa ilang trabaho.
Nadesisyunan usab nilang ang mga COVID-19 patients nga dili grabe ang gihambing simtomas, dili una dalhon sa ospital kondili diha lang sa mga isolation facilities.
Kini matud pa ang hinungdan nga bisan ang mga healthcare workers, apil na sa mihangyo ngadto sa publiko nga sudon kanunay ang mga health protocols pinaagi sa pagsuot sa face mask ug face shield, pag-sanitize kanunay sa mga kamot ug pag-obserba sa social distancing.
Bisan ang opisyal mihangyo na ngadto sa tanan nga makig-alayon gilayon sa ilang mga Barangay Health Emergency Response Teams kon BHERT higayong magsugod na pagsinati og simtomas sa COVID-19 aron matambagan sa angayang buhaton.
