BUTUAN CITY– Miresulta sa pagkasikop sa usa ka opisyal sa Comelec human ang gilusad nga entrapement operation sa mga sakop sa Criminal Investigation and Detection Group -CIDG Surigao del Norte, Food and Drug Administration (FDA) Caraga, ug sa Surigao City Police Station didto sa Rizal Street, Brgy. Washington, Surigao City pasado alas-11 sa buntag kagahapong adlawa.
Naila ang na-aresto nga si atty. Francisco Pobe Regional Director sa Comelec Caraga ug residente sa Dapa, lalawigan sa Surigao del Norte.
Sumala kang Food and Drug Regulation Officer III, Field Regional Supervisor Perla Alvizo, ilegal nga namaligya og Lian Hua Capsule ang dinakpan nga walay tukmang dokumento gikan sa FDA kansa kalapasan sa RA 9711 kon Food and Drug Administration Act of 2009.
Nakuha sa otoridad ang 500 ka kahon sa Lianhua capsule nga nagkantidad og P100,000. Padayon pang gipailalom sa imbesitgasyon ang suspek nga gituohang distributor sa maong tambal.
Subay sa FDA Advisory No.2021-0723 gipahimangnuan ang publiko nga dili mamaligya o mamalit og Drug Product nga Lianhua Qingwen Jiaonang with Chinese Characters tungod kay dili kini rehistrado.
Angayang masayran nga bugtong Lianhua Qingwen Jiaonang with English text ang gi-isyuhan lamang sa FDA og Certificate of Product Registration (CPR) ug aprobado nga mabaligya dinhi sa Pilipinas.
