BUTUAN CITY – Luwas nga naka-abot sa General Santos City ang gi-deploy sa Caraga Regional Disaster Risk Reduction and Management Council (RDRRMC) nga Regional Disaster Assessment and Needs Analysis (RDANA) Team.
Sigon ni Ronald Anthony Briol, tigpamaba sa Office of the Civil Defence kon OCD-Caraga nga alas 10:00 kagabii sila migikan og naka-abot sa rehiyon 12 pasado alas 5:00 kaganinang buntag. Ang maong RDANA Team gilangkuban sa 7 ka personahe gikan sa Office of Civil Defense Caraga Region, Department of Information and Communications Technology Caraga Region, Department of Health – Center for Health and Development Caraga, Department of Social Welfare and Development Field Office Caraga, og Department of Human Settlements and Urban Development Caraga Regional Office.
Sa ilang pag-abot, mihimo sila sa courtesy call kang USEC HAROLD CABREROS, Civil Defense Administrator sa OCD, og Dir. Rodrigo Sosmeña, Regional Directorsa of OCD Region 12.
Gisunod gelayon ang briefing kanila sa kasamtangang sitwasyon og assessment priorities aron maseguro nga coordinated og timely data gathering sa mga apektadong lugar.
Nag-unang katuyuan sa gi-deploy nga teams mao ang augmentation sa nagpadayon nga response efforts og suporta sa gihimong actual field assessments aron madetermina ang hinanaling humanitarian assistance og life-saving/sustaining needs sa kumunidad nga apektado sa linog.
Gane duna nay naka-standby nga mga non-food items sama sa family kits, hygiene kits, og shelter repair kits nga gihulat nalang ang request ngadto kanila.
Tungod niini nga panghitabo, gi-awhag sa opisyal ang tanang katawhan nga tabangan ang matag-pamilya sa pagpangandam sa katalagman sama sa linog.
Kini pinaagi sa seryosong pagsalmot sa mga earthquake drill tungod kay dako kini og tabang ilabina sa tunghaan.
