BUTUAN CITY – Mandatory na sa lalawigan sa Agusan del Sur ang pagpa-ilalom sa rapid test sa mga tawong gikan sa mga lugar nga duna’y local transmission sa COVID-19.
Sa eksklusibong pakighinabi sa Bombo Radyo Butuan, gipadayag ni Governor Santiago ‘Sante’ Cane Jr. nga wala’y exempted niini tungod kay laras kining ipatuman ngadto sa tanan apil na sa mga Authorized Persons Outside of Residence kon APOR base na sa ilang gi-aprubahang resolusyon.
Gani bisan silang mga opisyal ug bisan kinsa pang tag-as nga opisyal ug impluwensyadong indibidwal, dili gihapon exempted niini.
Tumong niining masiguro nga dili mahitabo sa ilang lalawigan ang nahitabong local transmission sa COVID-19 dinhisa dakbayan sa Butuan.
Dili matud pa angayang kumpyansahan ang coronavirus tungod kay wala kini tima-ilhan kung mitapot na sa usa ka tawo ug kung ang atong kasugat nga tawo, duna ba sa makamatay nga virus o wala.
Samtang giklaro sa opisyal nga wala’y plano ang probinsyal nga panggamhanan nga pabayron ang tanang mga tawong gikan sa gawas sa Caraga Region ug gustong musulod sa ilang lalawigan alang sa pagpa-ilalom nila sa rapid test.
Kini human gipangutana kung susama ba ang ilang ipatumang patakaran sa dakbayan sa Butuan nga planong manukot og 500-pesos niadtong gikan sa gawas sa Caraga Region ug gustong musulod sa Butuan.
Mahinumdumang gipadayag ni Butuan City councilor Cherry Mae Busa, chairman sa Sangguniang Panlungsod sa Butuan nga aprubado na sa ikaduhang pagbasa sa committee level sa Sangguniang Panlungsod ang resolusyon alang sa maong katuyuan.
Gipadayag usab ni Governor Cane nga ang ilang lakang kabahin sa protective measures kondiin ang mga tawong musulod sa ilang lalawigan nga gikan sa mga lugar nga duna’y local transmission sa COVID-19, kinahanglang mupa-ilalom sa rapid test ug mupa-ilalom sa 14-ka adlaw nga kwarantina ang mga magpositibo.
Gustuhon man nilang manukot aron ma-abagan ang mahal nga gasto ilabina sa swab test, apan dili nila kini mahimo tungod kay gimando man ni Pangulong Rodrigo Duterte nga dili kini pabayran tungod kay gi-abaga kini sa nasudnong kagamhanan.
