BUTUAN CITY – Nagpasidaan ang Second Congressional Commission on Education (EDCOM2) nga alarming na ang migawas nga pinakabag-ong survey sa Department of Science and Technology–Food and Nutrition Research Institute nga padayong misaka ang ihap sa mga batang kulang sa nutrisyon ug putot dinhi sa nasod.
Base sa resulta sa 2025 Updating Survey, mokabat sa 25.3 porsiyento kon bugti sa usa sa matag-upat ka mga bata nga lima ka tuig ang panu-igon paubos ang nakasinati og stunting o hinay nga pagtubo tungod sa kakulang sa hustong nutrisyon kansa usa ka seryosong problema sa panglawas tungod sa padayon nga pagtaas sa gidaghanon sa mga batang apektado.
Gipasabot usab sa komisyon nga ang epekto sa malnutrisyon dili lamang makita sa pisikal nga pagtubo sa bata tungod kay maka-apekto usab kini sa paglambo sa panghunahuna, abilidad sa pagkat-on, ug ka-andam sa mga bata pagsulod sa eskwelahan. Tungod niini, gibutyag sa EDCOM2 nga ang problema sa edukasyon sa nasod nagsugod nang daan sa wala pa makasulod sa klasrum ang usa ka bata.
Migawas usab sa survey nga mas grabe ang kahimtang sa mga kabos ug bulnerableng komunidad, diin mas daghang mga bata ang nag-atubang sa kakulang sa pagkaon ug hustong nutrisyon.
