BUTUAN CITY – Siyam na lang ang natalang ‘Patients Under Investigation’ kon PUIs karon sa Caraga Region human nagnegatibo ang 23-anyos nga PUI nga namatay dihang gidala sa Caraga Regional Hospital sa Surigao City.
Base sa COVID-19 situational report no. 49 sa Department of Health-Center for Health and Development kon DOH-CHD Caraga, sa maong ihap, duha ang pabilin pang gitambalan sa ospital samtang ang laing pito gipa-ilalom gihapon sa istriktong home quarantine.
Base usab sa ilang COVID-19 PUI tracker, pito kanila ang ania sa Butuan samtang tag-usa ang natala ning lalawigan sa Agusan del Norte ug Surigao City.
Samtang sa 7,804 ka mga ‘Persons Under Monitoring’ kon PUMs, mi-abot na sa 7,674 ang cleared na human nga nakatapos na sa ilang quarantine period samtang 130 na lang ang padayong gi-monitor.
Una nang gibutyag kagahapon ni Dr. Jose R. LLacuna Jr., Regional Director sa Department of Health kon DOH Caraga nga ilang nadawat kagahapon sa buntag ang resulta sa swab test gikan sa Southern Philippines Medical Center.
Ang maong report gikalipay sa opisyal tungod kay dinhi nakumpirma nga namatay ang maong pasyente tungod sa iyang pre-existing medical condition nga Chronic Kidney Disease ug dili sa COVID-19 bisan paman nga duna usab kini travel history nga natala gawas sa rehiyon.
