BUTUAN CITY- Nagpahimangno ang Office of Civil Defense (OCD) ug mga lokal nga panggamhanan sa publiko, ilabina sa mga residente sa Metro Manila ug mga kasikbit nga probinsya, nga mag-amping batok sa dili maayong kalidad sa hangin tungod sa baga nga haze o aso nga gikan sa mga sunog sa kalasangan sa Kalimantan, Indonesia.
Sumala ni OCD Deputy Administrator Assistant Secretary Raffy Alejandro, nakaabot sa Pilipinas ang aso gikan sa mga wildfires human kini madala sa ming-igting nga hangin padulong sa nasod.
Tungod niini, pipila na usab ka lokal nga panggamhanan ang mipagawas og kaugalingong mga pahimangno, lakip na si Caloocan City Mayor Along Malapitan kinsa miawhag sa mga residente nga magsul-ob og face mask sa paggawas sa balay aron malikayan ang posibleng epekto sa haze sa panglawas, human makaplagan ang dili maayong lebel sa kalidad sa hangin sa siyudad ug sa tibuok Metro Manila.
Samtang, sumala sa Department of Environment and Natural Resources–Environmental Management Bureau (DENR-EMB), padayon nilang gibantayan ang kalidad sa hangin sa mga apektadong lugar, ilabina sa National Capital Region (NCR), CALABARZON ug MIMAROPA, samtang nagpadayon ang mga awtoridad sa pagsusi sa lebel sa polusyon ug gibaga-on sa aso aron matino ug maandam ang posibleng epekto niini sa panglawas sa publiko ug sa kinaiyahan.
