BUTUAN CITY- Gipasidan-an sa Bangko Sentral ng Pilipinas kon BSP ang Department of Agriculture kon DA sa dakong hulga nga mahimong resulta sa grabeng hulaw tungod sa El Niño sa suplay ug presyo sa pagkaon sa nasud, samtang dugang nga nakapabug-at ang kagubot sa kalibutang merkado ug presyo sa bugas.
Isip lakang batok sa nagpadayong inflation, gipatas-an sa BSP og 25 basis points ang key interest rate ug wala niini isalikway ang posibilidad sa dugang pang monetary action kon mosaka pa ang presyo sa mga nag-unang palaliton.
Nahimong mas kritikal ang sitwasyon human mikunhod og 4.85% ang produksyon sa humay niadtong 2024, samtang misaka og 21% ang All Rice Price Index niadtong 2023 human nagpahigayon og export ban ang India tungod sa hulga sa El Niño.
Tungod niini, gimandoan ni Agriculture Secretary Francisco Tiu Laurel Jr. ang tanang ahensya sa DA nga palig-onon ang ilang El Niño response plan pinaagi sa paggamit sa pinakabag-ong datos sa panahon, kahimtang sa mga tanom, suplay sa tubig ug merkado, lakip ang cloud seeding, solar irrigation, pagbalhin sa produksyon ngadto sa dili maapektuhang mga lugar, pag-apod-apod og binhi nga makasugakod sa hulaw, crop insurance ug direktang pinansyal nga ayuda alang sa mga magsasakang maapektuhan sa hulaw.
