Presyo sa mga buwak sa Butuan City karong kalag-kalag, musaka og sobra pa sa 100%

BUTUAN CITY – Mu-abutay pa dinhi sa dakbayan sa Butuan ang mga buwak nga gi-import sa mga flower vendors gikan sa Bukidnon ug Manila alang sa nagkaduol nga Kalag-kalag.

Sa pagkakaron, gipadayag sa mga flower vendors sa may J Flores Avenue nga duna pa’y mapalit nga mga baratong bulak sa presyo nga 100 ngadto sa 150-pesos ang matag-bugkot apan musaka na matud pa kini pagsugod sa Oktubre 29 hangtud na sa mismong adlaw sa kalag-kalag sa Nobyembre 1 ug 2.

Sigon ni Narcisa Awa, sa pagkakaron diha pa sa Brgy. Alubihid sila mangumpra og buwak kay dili pa kaayo kusog ang demand niini rason nga sugod sa Oktubre 29, mupatong na sila og dinagko tungod kay gikan na man kini sa gawas sa Caraga region diin kinahanglan pa kining ibiyahe.