BUTUAN CITY – Misaka na ang presyo sa pipila ka klase sa utanon ug isda tungod sa kadaot nga nahatag sa Habagat ug sa mga mi-aging bagyo nga Luis ug Maymay sa mga umahan ug isdaan.
Sumala sa datos sa Department of Agriculture o DA, mi-abot na sa P1.4 bilyones ang kinatibuk-ang kadaot sa sektor sa agrikultura tungod sa mga mi-aging kalamidad.
Tungod sa kusog nga ulan ug pagbaha, misaka ang presyo sa pipila ka utanon nga gikan sa Cordillera Administrative Region, Central Luzon, ug Southern Tagalog kondiin ang cauliflower, misaka ngadto sa P180 hangtod P350 kada kilo, gikan sa P120 hangtod P270.
Ang pechay Baguio anaa na sa P40 hangtod P150, samtang ang carrots mi-abot na sa P170 kada kilo apil na ang presyo sa repolyo, paliya, talong ug sitaw.
Apil usab sa misaka ang presyo sa pipila ka klase sa isda sama sa budloy nga mi-abot na sa P400 kada kilo, samtang ang bangus anaa sa P160 hangtod P320 kada kilo ug ang tilapia anaa na sa P200 kada kilo.
Sa Benguet, pipila ka mag-uuma ang napugos sa paglabay sa ilang mga ani nga carrots ug repolyo human kini madunot samtang naghulat nga madala ug mabaligya sa La Trinidad.
