BUTUAN CITY – Gibiliban ni Atty. James Reserva ang mga pangutanang gibato sa mga panelists kagabii atol sa presidential debate nga gi-host sa Sonshine Media Network International (SMNI) TV channel ni Pastor Apollo Quiboloy nga gipahigayon sa Okada, Manila ug gitambungan sa upat lang ka mga presidential bets.
Sa eksklusibong pakighiabi sa Bombo Radyo Butuan, gipadayag ni Atty. Reserva nga gisayangan lang sa ubang mga presidentiables ang kahigayunan nga matubag unta nila ang mga puno sa punto ug komprehensibong pangutana sa mga banggi-itang panelists nga maoy nagpa-init sa dagan sa debate.
Sa maong detabe unta matud pa masukod sa katawhan kung kinsa kanila ang angayang botaran aron mudumala sa nasud.
Ang maong klase sa mga pangutana kagabii mao matud pa ang standard nga mga pangutana nga posibleng dili matubag sa mga kandidatong wala mutunga kagabii.
Dugang pa ni Atty. Reserva, makabilib ang tubag sa mga kandidato ilabina nga impromptu kini human nga wala musugot ang panelist nga si Professor Carlos nga kuhaon daan ang ilang mga pangutana.
Tungod niini, wala’y nag-leak nga mga pangutana nga mahimo unyang tun-an sa mga presidential bets.
