BUTUAN CITY- Nanawagan si Ferdinand “Bongbong” Marcos Jr. sa mga Pilipino nga gakson ang paglaum, panaghiusa, ug pagtinabangay sa pagsaulog sa Easter Sunday, kansa nagtimaan sa pagkabanhaw ni Hesukristo ug katapusan sa Semana Santa.
Sa iyang mensahe, gipasiugda sa Presidente nga ang Pasko sa Pagkabanhaw maoy kinatumyan sa balaang semana ug simbolo sa kadaogan sa kinabuhi batok sa kamatayon ug paglaum batok sa kahadlok.
Giawhag usab niini ang katawhan nga isabuhay ang mga mithi sa pagtuo pinaagi sa maayong buhat ug kolektibong responsibilidad aron mapalig-on ang nasudnong panaghiusa.
Sumala pa sa Presidente, nga ang walay sulod nga lubnganan nagpasabot nga ang kinabuhi midaug batok sa kamatayon, ug pinaagi sa pagtuo, gugma sa nasud, ug panaghiusa, malaposan ang tanang pagsulay.
Gitumbok usab ni Marcos ang kamahinungdanon sa pagtukod sa “Bagong Pilipinas” nga gipasukad sa malasakit ug pag-atiman sa isigkatawo, samtang gipahinumduman ang tanan nga ang sakripisyo dili mausik ug ang kalisod mahimong sinugdanan sa bag-ong paglaum.
Sa katapusan, iyang giaghat ang matag Pilipino nga mobangon uban sa bag-ong katuyoan, lig-on nga paglaum, ug responsibilidad sa usag usa, ug ipakita ang diwa sa Pasko sa Pagkabanhaw matag adlaw pinaagi sa pagkamabinuligon, pagkamanggihatagon, ug panaghiusa.
