BUTUAN CITY – Gipanghimakak ni P/Sr. Insp. Joepetrus Catubig, ang nanggawas nga impormasyon sa social media nga duna na’y mga membro sa teroristang grupong Maute sa ilang area of responsibility sa lungsod sa Magallanes, Agusan del Norte.
Sa pakighinabi ning sibyahan, gibutyag sa opisyal nga daghan na ang nangutana sa ilang buhatan kalabot sa maong report nga mikaylap sa social media.
Sigon sa opisyal, ang nagpasi-ugda sa maong balita mao kadtong mga tawong wala’y lingaw sa kinabuhi kondili ang pagsabwag lang og kadaut nga dili maka-ayo sa katilingban.
Samtang ang gamay’ng komunidad sa mga Muslim sa ilang lungsod, ilang gi-monitor gawas nga nakig-alayon na usab kini kanila ilabina kung duna’y bag-ong muabot sa ilang komunidad.
Hangyo niini sa katawhan sa ilang lungsod nga dili dayon mutuo og dili gilayon ipakuyanap ilabina sa social media ang makuhag impormasyon aron dili maghatud og panic sa mga tawo.
Mas maayong buhaton ang pagklaro niini ngadto sa buhatan sa kapulisan aron masuta ang kamatu-uran niini.
Mi-apela usab siya sa mga tawo nga kung duna’y mamatikdang tawong duna’y kadudahang lihok, itaho gilayon kini sa ilang buhatan. (Beth Ruiz)
