BUTUAN CITY- Mipahigayon og intensive livestream training ang mga personnel gikan sa Department of Education Caraga ug Department Information Officers (DIOs) sa Provincial Government of Agusan del Sur isip kabahin sa preparasyon alang sa naka-iskedyul nga dry run sa livestream operations alang sa Palarong Pambansa 2026 kagahapong adlawa, Huwebes Mayo 14 sa Provincial Learning Center sa Patin-ay, Prosperidad.
Gipunting sa maong pagbansay ang pagpalig-on sa technical readiness ug koordinasyon sa mga partisipante sa pagdumala sa real-time coverage sa nagkalainlaing playing venues atol sa national sporting event. Pinaagi sa practical demonstrations ug operational walkthroughs ubos sa giya sa Provincial Information Management Office (PIMO), gihatagan ang mga partisipante og kahibalo sa hustong livestream setup, coverage flow, ug troubleshooting procedures aron maseguro ang hapsay ug kasaligan nga operasyon panahon sa Palaro.
Kabahin usab sa preparasyon ang pag-assign sa mga personnel ngadto sa ilang tagsa-tagsa ka playing venues diin sila adunay importanteng papel sa paghatag og tukma ug paspas nga impormasyon sa publiko. Gipasiugda usab ni Media Relations and Communication Committee Chairperson ug PPIO Head PJ V. Dela Peña Jr. ang dakong kontribusyon sa mga DIOs, DepEd personnel, ug City ug Municipal Information Officers sa pagsiguro nga kalidad, tukma, ug timely nga impormasyon ang maabot sa katawhan atol sa tibuok semana nga sporting event.
