BUTUAN CITY – Gi-otopsiya na ang patay’ng lawas sa overseas Filipino worker kon OFW nga naghikog samtang anaa sa sherlter sa Philippine Embassy sa Baabda, Lebanon pinaagi sa pag-ambak sa kusinang bahin nga anaa sa ika-upat nga andana sa maong embahada.
Sa eksklusibong pakighinabi sa Bombo Radyo Butuan, gi-ila ni Divina Ramirez, advocate sa MRRD-NECC Lebanon Chapter, lumad nga taga-Candon, Ilocos Sur, ang biktimang si Jenalyn Banares Borbor, lumad nga taga-Albay ug anaa na sa shelter sa embahada nagpuyo.
Sa iyang pakighinabi ngadto sa duha ka ig-agaw ni Borbor, diha matud pa sila sa kusina dihang kalit lang migawas ang biktima ug mi-adto sa balkonahe hangtud nasayran na lang nilang mi-ambak na kini.
Gibalik matud pa kini sa iyang amo didto sa embahada tungod sa nakitang problema sa iyang pangisip nga daw na-depress apan wala sa huna-huna sa mga ig-agaw niini nga mu-ambak kini.
Samtang aminado si Ramirez nga daghang mga isyu ang mitunga karon sa Lebanon nga pagpangdaut kang Pangulong Rodirigo Duterte aron ipagawas nga nagpasagad ang administrasyong Duterte ilabina nga bag-uhay pa lang namatay tungod sa COVID-19 ang ambassador sa Pilipinas sa maong nasud. Apan giklaro niining wala magpasagad ang mga opisyales sa embahada dayong klaro nga dili madala pagpa-uli sa Pilipinas ilabina nga naka-lockdown ang Lebanon tungod sa COVID-19.
