BUTUAN CITY – Kusog ang impact nga hatud sa pagpakanaog og guilty verdict ni Quezon City Regional Trial Court Branch 221 Judge Jocelyn Solis-Reyes batuk sa mga nag-unang akusado sa Maguindanao massacre.
Sa eksklusibong pakighinabi sa Bombo Radyo Butuan, gipadayag ni Presidential Communications Operations Office kon PCOO Secretary Martin Andanar nga sukad sa maong masaker niadtong Nobyembre 23, 2009, wala na matangtang pa ang Pilipinas human nabutang sa listahan sa lima ka mga nasud sa kalibutan nga delikado kaayo alang sa mga tigbalita kon mga journalists.
Gibutyag ni Sec Andanar nga tungod sa maong desisyon, natangtang na ang Pilipinas gikan sa maong listahan kansa makonsiderang dakong kada-ugan sa nasud.
Gipasabot ni Sec. Andanar nga wala na’y rason nga mabutang ang Pilipinas sa maong listahan tungod kay klarong duna’y gihimo ang judicial system sa nasud ngadto sa mga suspek.
Kini gawas pa sa gimugnang Presidential Task Force on Media Security kon PTFoMS, tulo ka mga tuig na ang nakalabay pinaagi sa Administrative Order No. 1 nga gipagawas ni Pangulong Rodrigo Duterte.
Ang PTFoMS nga aktibo kaayo, bugtong sa Pilipinas lang makita sa tibuok kalibutan aron protektahan ang mga mediamen ug ang ilang pamilyang duna’y hulga sa kinabuhi.
