BUTUAN CITY – Mipirma ang Pilipinas ug Estados Unidos sa lima ka tuig nga Health Strategic Objective Agreement nga mag-gahin og hangtud 42 bilyones pesos aron pakusgon ang pagtumbok, pagtambal og paglikay sa HIV ug tuberculosis (TB), ug mapalambo ang health security sa nasud.
Sumala sa U.S. Embassy sa Pilipinas, ang kasabutan gipirmahan niadtong Hulyo 22 kauban ang Department of Health (DOH).
Sa ilalom sa kasabutan, maggahin ang Pilipinas og kapin 30 bilyones pesos sulod sa lima ka tuig aron pakusgon ang sistemang panglawas smatang plano usab sa U.S. nga maghatag og kapin 11.8 bilyones pesos, depende sa pag-apruba sa U.S. Congress.
Tumong sa kasabutan nga pug-ngan ang pagkaylap sa mga makatakod nga sakit, pakusgon ang disease surveillance ug outbreak response, ug pahapsayon ang pagpondo ug agdumala sa sektor sa panglawas.
Sumala sa U.S. Embassy, nakabase ang kasabutan sa kapin 60 ka tuig nga kooperasyon sa panglawas tali sa duha ka nasud og nagpakita sa ilang hiniusang tumong nga pakusgon ang kapasidad sa Pilipinas batuk sa makatakod nga sakit ug mga musunod pang hulga sa panglawas sa publiko.
Gipirmahan ang kasabutan ni U.S. Ambassador Lee Lipton dungan sa pagbisita sa Pilipinas ni U.S. Secretary of State Marco Rubio.
