BUTUAN CITY- Gibutyag ni Philippine Ambassador to France Eduardo de Vega nga adunay lig-on nga impormasyon nga si kanhi Ako Bicol Rep. Zaldy Co anaa sa France ug posibleng adunay kabtangan sa maong nasud, apan wala pa’y opisyal nga kumpirmasyon sa iyang presensya.
Matud ni De Vega, adunay source nga nagsulti nga si Co nagapangayo og asylum, apan ang embahada dili puwedeng maghimo og surveillance o pagdakop tungod kay kini posibleng makalapas sa soberanya sa France. Gipunting niini, nga ang warrant of arrest sa Sandiganbayan dili magamit gawas sa teritoryo sa Pilipinas ug kinahanglan nga pinaagi sa French authorities o Interpol ang proseso.
Dugang pa ni De Vega, bisan pa sa mga alegasyon, ang embahada ug Filipino community sa France walay awtoridad sa pagdakop, ug naglaum ang gobyerno nga pinaagi sa maayong bilateral relations makab-ot ang hustong solusyon sa isyu.
