BUTUAN CITY – Kapin na sa 2,500 ka tawo na ang namatay tungod sa Ebola outbreak sa Democratic Republic of Congo, samtang paspas gihapon ang pagkaylap sa sakit.
Sigon ni United Nations Ebola coordinator Julien Harneis, dili na makasabay ang response operations sa paspas nga pagkaylap sa outbreak. Nanawagan usab siya og dugang nga pondo tungod kay posible nga mahurot na sa umaabot nga mga semana ang kasamtangang pondo alang sa pagtubag sa epidemya.
Ang maong outbreak mao na ang ika-17 nga Ebola epidemic sa Congo ug nalabwan na niini ang pinakadakong outbreak sa nasod nga nahitabo gikan niadtong tuig 2018 hangtod 2020, base sa gidaghanon sa mga kaso.
Ang outbreak tungod sa Bundibugyo species sa Ebola, diin wala pa’y aprubadong bakuna o tambal ug sa pagkakaron, mukabat na sa 160 ka mga health workers ang natakdan, ug 43 niini ang namatay.
Dugang sa hulga sa virus, nameligro usab ang mga health workers tungod sa mga pag-atake sa pipila ka residente. Kapin 260 ka insidente sa pag-atake ang natala sulod sa miaging unom ka bulan, lakip ang walo nga namatay.
Aduna usa’y mga ambulansyang gibato ug gisunog, samtang pipila ka health facilities ang gi-atake tungod sa kahadlok, kasuko ug misinformation bahin sa outbreak.
