BUTUAN CITY – Gikumpirma sa Caribbean Airlines nga usa ka pasahero sa usa ka flight gikan sa Jamaica padulong sa New York ang nanganak dihang patugpa na unta ang abyon sa John F Kennedy Airport.
Nagpagawas og news release ang airline nga nagkumpirma sa insidente uban sa pagpagawas sa panag-istorya tali sa pilot ug usa ka ground control operator kinsa nakapangutana pa kung migawas na ba ang bata ug gikumpirma usab sa piloto.
Sigon sa airline, gitabangan gilayon ang babaye ug ang iyang anak sa ilang medical personnel dihang mitugpa na ang abyon.
Gidayeg sa airline ang pagka-propesyunal ug ang pagresponde sa ilang mga crews nga maoy nagdumala sa sitwasyon base na sa na-establisar na nilang procedures, nga nagsiguro sa kaluwasna ug kakomportable sa tanan nga sakay sa abyon ilabina nga wala’y gideklarang emergency atol sa flight.
Karon, anaa na sa inahan kung sundon niini ang sugyot sa medical staff nga panganlan ang iyang anak og Kennedy tungod kay gi-anak man kini pagtugpa gayod sa Kennedy Airport.
