BUTUAN CITY- Giaprubahan na sa parlamento sa Myanmar ang Anti-Online Scam Bill, nga nagtakda sa parusang kamatayon alang sa mga responsable sa grabe nga mga krimen nga nalambigit sa cyberscam, lakip ang pagpamugos, torture, ilegal nga pagdakop ug pagdetinar sa mga tawo aron pugson nga magtrabaho sa online scam centers.
Sumala ni Union Parliament Speaker Aung Lin Dwe, opisyal nang napasar ang balaod human aprobahan sa duha ka kapulungan ang mga giusab sa draft bill niadtong Hulyo 28 sa Naypyidaw.
Ilalom sa balaod, mahimong silotan og 10 ka tuig hangtod habambuhayng pagkabilanggo o kamatayon ang mga sad-an, samtang life imprisonment usab ang ipataw sa mga nagdumala sa online scam centers ug crypto scam.
Kon ang maong kalapasan mosangpot sa kamatayon sa biktima, obligadong ipatuman ang death penalty. Gihimo ang balaod isip tubag sa nagkadaghang internet fraud operations sa nasud nga nagpunting sa mga biktima sa tibuok kalibotan pinaagi sa romance ug cryptocurrency investment scams.
Kini usab ang unang balaod nga napasar ubos sa bag-ong gobyerno sa Myanmar nga gipangulohan ni dating junta chief Min Aung Hlaing.
